صفَّر..يا حكم!!

**أمـــل** · 01-03-2004, 01:15 AM

[align=center]

موضوعي ممكن طريف لكني قريته ف الجريدة وعجبني وحبيت انقله لكم بأسلوبي

موضوعي يدعوكم للمناقشة، بس ف المجال الرياضي

والكل الحين منشغل بمتابعة مباريات كأس الخليج الحالية

وف نظري اكيد المتابع للمباريات مريض الحين،
فيا عنده ضغط ف نسبة السكر او ارتفاع ضغط الدم

هاذا غير الاعصاب المشدودة اللي تنشد من اول ما يصفّر الحكم وتتنتف الاعصاب لين نهاية المبارة ( اذا محد جاته جلطة الله يبعدها عنكم الحمد لله ههههه )

السالفة مب سالفة حالتكم لما تشوفون المباريات

السالفة عن الاشياء اللي اقراها واشوفها واستغرب منها!

يعني مثلاً تفاعل الجمهور.....شلون اذا الفريق المنافس دخل جول

اشوفهم يحذفون اللاعب بالعلب وقواطي العصير وغرشات الماي

( صراحة، اسمحولي ع الكلمة بس تصرف همجي وايد )

وبعض الاحيان اقرا ف الجرايد عن رجل طلّق زوجته لانها عصبّت فيه أثناء متابعته لمبارته

او انها رفضت تجهز له الاكل واهو حظرته يشوف المبارة

او بطريقة، الزوج يتابع المبارة واهي مرت جدامه وتمت تصارخ ع العيال
ما غير يعصب ويقوم يقولها: يا فلانة انتي طالق بالثلاث!

( اشدعووووووووووووووووووووه، خرب بيته عشان كوره! )

انا مو قصدي انه الكورة مب ممتعة
فمع اني بنت اتابع المباريات وربعي بعد يتابعون
ونعلق ونشتط ونشجع ونزعل

بس ف حدود المعقول

الحين ممكن تلقى حد متهاوش مع رفيجه عشان رفيجه يشجع الفريق المنافس او زوجة وعليه وفية لزوجها، يطلقها زوجها بسبت مبارة

من فترة قصيرة قريت ف إحدى المجلات عن مشجعة خليجية
بعد ما خسر فريقها ارتفع الضغط عندها وماتت ( الله يرحمها ) وكانت الزوجة حامل

يعني وعليه عليها، المبارة أثرت ف نفسيتها واايد

حرام الواحد يسوي ف نفسه جي.....
يمسك اعصابه ويعصب ع اللي حوليه ويخرب ويهدم كل شي

هاي المشجعة - كان يومها- بس انا اشوف لو انها خذت الامر بشكل عادي
كان اهون...

يعني احنا راح نسأل من السبب؟

الاحد عشر لاعب اللي يلعبون؟
ولا
الكورة الي تنطط ف المعلب؟؟؟

انا اعترف اني وايد انفعل ف المباريات وافقد اعصابي بعض الاحيان

بس امسك نفسي شوي واعقل

يعني اخبر العام نزلت لي كم دمعة عشان خسرنا ضد السعودية وطلعنا المركز الثاني

(( يابلفيت حساسة ! هههه ))

عشان جي اقول للعنابي : هاتوا الكاس وتعالوا!

تراكم ما تدرون انه المجتمع القطري مهدد بالمرض بسبتكم !!

[/align]